Pagbabawal sa Filipino dubbing ng pelikulang Ingles, tinutulan ng KWF!

Mariing tinutulan ng Komisyon sa Wikang Filipino (KWF) ang panukalang batas na naglalayong ipagbawal ang Filipino dubbing sa mga pelikula at programang Ingles na ipapalabas sa bansa.

Mariing tinutulan ng Komisyon sa Wikang Filipino (KWF) ang panukalang batas na naglalayong ipagbawal ang Filipino dubbing sa mga pelikula at programang Ingles na ipapalabas sa bansa.

Sa isang pahayag, sinabi ng KWF na hindi dapat isakripisyo ang wikang Filipino para lamang matutong gumamit ng wikang banyaga.

“Nagkakaisa ang Lupong Tagapagpaganap ng Komisyon sa Wikang Filipino (KWF) na sina Kom. Arthur P. Casanova, Kom. Benjamin M. Mendillo Jr., Kom. Carmelita C. Abdurahman, at Direktor Heneral Atty. Marites A.Barrios-Taran na dapat itong tutulan sapagkat hindi kailanman batayan ang pagsasaalang-alang sa kakayahan nating gumamit ng banyagang wika upang isakripisyo ang sarili nating wika para lamang umangat ang ating iskor sa pamantayang global habang gutom at kumakalam ang sikmura ng maraming mamamayang Pilipino at matunaw ang ating wika na pundasyon ng ating kasarinlan at karunungan!” saad sa pahayag ng KWF.

“Ang pag-ban sa pagsasa-Filipino sa mga pelikula ay paniniil sa dapat na maunawaan ng mga Pilipino sa kanilang pinanonood. Dapat itong tutulan,” dagdag pa ng komisyon.

Si Negros Occidental Representative Jose Francisco “Kiko” Benitez ang naghain ng House Bill 9939. Aniya, malaki ang papel ng wikang Ingles sa paglago ng mga negosyo sa bansa, partikular ang industriya ng business process outsourcing. Kaya naman, layunin niya na kahit sa mga programang pinapanood ay mahasa ang mga Pilipino sa wikang Ingles.

“We must therefore help younger generations acquire English in different settings, and through different media, to enable them to communicate better and explore new horizons, in terms of employment and social interaction,” wika ni Benitez kamakailan.